Allt þetta fína frá Kína

Við vöknuðum snemma í morgun til að mæta á dag jarðarinnar sem haldinn er hátíðlegur hjá Rainbow bridge skólanum í dýragarðinum.  Eins og vaninn er á Íslandi var spáin á báðum áttum hvort það ætti að rigna eða ekki.  Allir voru fegnir í morgun að sjá að sólin skein, jafnvel þó að töluverður vindur var. Boggi og Örn tóku þátt í þéttskipaðri dagskrá.  Boggi spilaði á gítar ásamt krökkunum í gítar class.  Örn tók þátt í mjög flottri kungfu sýningu.  Krakkarnir komu hlaupandi á harðaspretti og spörkuðu af öllu afli í púðann hjá kennaranum, báðir fætur frá jörðu.  Síðan sýndu þau ýmsar hreyfingar sem þau hafa lært í vetur og undir hljómaði "Everybody is Kungfu fighting" á fullu.  Eftir þetta söng Örn ásamt Kindergarten krökkunum lag um hafið.  Allir bekkirnir tóku þátt í að semja textann við lagið.  Að lokum söng Earth day kórinn nokkur lög, en Örn er búinn að vera að æfa með honum í vor.  Á meðan sátum við á picknick teppinu okkar með öl og gos og nutum lífsins.  Ásta er farin að vekja töluverða athygli og var mikið tekið af myndum af henni. Tveir kínverjar með stórar myndavélar voru grunsamlega spenntir yfir brjóstagjöfinni. Það var eins og þeir væru að bíða eftir að sjá í bert.  Mér gæti nú ekki verið meira sama.  Boggi komst svo í fótbolta með krökkunum í skólanum og kom lurkum laminn til baka.  Hann gat varla gengið og var skítugur upp fyrir haus.  Við þurftum því að skella honum í bað áður en við héldum í afmæli hjá Lív sem var 7 ára í dag.  Lára og Baddi héldu þessa glæsilegu garðveislu þar sem boðið var upp á grillað nautakjöt, risarækjur og kjúkling á pinnum, rjómakökur, íslenskar vöfflur, pizzur og fleira og fleira. Í heimsókn kom mjög svo skrítinn trúður sem skemmti börnunum.  Síðan héldu þau áfram að leika sér úti á róló fram á kvöld.    

Ég var að koma af sýningu í skólanum þar sem kindergarten bekkirnir voru að fjalla um hafið og ýmislegt því tengt. Bekkurinn hans Arnar talaði um hákarla og var þar ýmis fróðleikur um þá, t.d. að þeir séu ekki mjög áhugasamir um að éta fólk og að það sé mjög sjaldgæft.  Örn missti af undirbúningi sýningarinnar út af Íslandsferðinni og fékk því það hlutverk að bjóða alla velkomna inn í stofuna.  Hann var klæddur í hákarlabúning og sagði við gestinga "save the sharks".  Þeir sem vildu taka af honum mynd fengu mjög flottan myndasvip enda vanur maður á ferð.  

Shanghai tók á móti okkur með glampandi sól.  Ferðin gekk vel þrátt fyrir stopp í London.  Við fundum þennan fína pub og garðverslun þar sem við fengum okkur svo stóran hamborgara að við vorum södd alla ferðina.  Ég keypti þar bók um það hvernig á að rækta kál, ávexti og kryddjurtir.  Ásta er orðin ferðavön og kippir sér ekki lengur upp við flugtak og lendingu.